Zülfüñ çü gâret-i dil ü îmân u dîn ider
Nem var dahı ki gözlerüñ almaga kîn ider
İtdi göñül saçuñı heves bilmedi anı kim
Deryâya ugrar ol kişi kim kasd-ı Çîn ider
Bâd-ı sabâ saçuna irişdi meger ki anuñ
Her kanda ki irişür nefesi anberîn ider
Aksi yañaguñuñ n’ireye kim irer-ise
Lâle bitürür ü gül-ile yâsemîn ider
Bir katresi-y-içün lebüñüñ teşne-dil olup
Âb-ı Hayât kendüyi hâk-i zemîn ider
Gözüm getürdi cânuma gamzeñ belâsını
Kişiye her ne ider-ise hem-nişiñ ider
Didüm kaşuñ gözüñe ki fitne olur didi
Bu fikri Ahmedî bigi bârîk-bîn ider