Derd ile giryân olayın bir zamân
Aşk ile sûzân olayın bir zamân
Rûz u şeb feryâd edip gül şevkına
Bülbül-i nâlân olayın bir zamân
Erişem şâyed ki bahr-i Kulzüm’e(*)
Katre-i nîsân olayın bîr zamân
Nâr-ı aşka cân atıp pervâne-veş(*)
Yanayın biryân olayın bir zamân
Gördüğüm Leyli sanıp Mecnûn gibi
Vâlih ü hayrân olayın bir zamân
Kalmayınca tâ vücûdumdan eser
Hâk ile yeksân olayın bir zamân
Vâsıl olunca hakîkat gencine
Yıkılup vîran olayın bir zamân
Hazret-i Yûsuf’la İsmâ’îl gibi
Kul olup kurbân olayın bir zamân
Zerreler gibi gehi edip zuhûr
Geh yine pinhân olayın bir zamân
Erişem şâyed sarây-ı vahdete
Tekyede mihmân olayın bir zamân
Cân ü ten kaydından olmağa halâs
Soyunup uryân olayın bir zamân