Cân ü dilden Hâlık’ı zikr edelim
Hoş sa’âdet ehli etmiş Hak bizi
Lutf -ı bî-pâyânına şükr edelim
Hoş sa’âdet ehli etmiş Hak bizi
Ehl-i îmân ehl-i İslâm eyledi
Bunca lutf u bunca in’âm eyledi
Fazl ü ihsânını itmâm eyledi
Hoş sa’âdet ehli etmiş Hak bizi
Etdi lutfundan Habîb’in ümmeti
Hem nasîb etdi sarây-ı vahdeti
Umarız envâ’-ı feth ü nusreti
Hoş sa’âdet ehli etmiş Hak bizi
Yardım etdi çün inâyet askeri
Rehber oldu enbiyânın serveri
Eyledi nûr-ı hakîkat mazharı
Hoş sa’âdet ehli etmiş Hak bizi
Şems-i vahdetden erişdi sırr-ı nûr
Hâsıl oldu kalbe envâ’-ı sürûr
Ey Hüdâyî ola gör abd-i şekûr
Hoş sa’âdet ehli etmiş Hak bizi