Derûnun ser-te-ser aşk ile dolsun
Dil ü cân matlab-ı a’lâyı bulsun
Vücûdun mülkü ko Allah’ın olsun
Sarây-ı sırrına sultân ola Hak
Ko kibr ü ucbu nefsin hâk edegör
Enâniyyet hicâbın çâk edegör
Derûnun mâsivâdan pâk edegör
Sarây-ı kalbine mihmân ola Hak
Edegör rûz u şeb kat’-ı menâzil
Olunca Kâ’be-i a’mâle vâsıl
Şuhûdunda olıcak kişi kâmil
Ana hem dîn ü hem îmân ola Hak
Tarîk olup sana râh-ı hidâyet
Olursa rehberin Fahr-ı Risâlet
Tecellî ede ger nûr-ı hüviyyet
Senin her derdine dermân ola Hak
Hüdâyî mazhar-ı envâr-ı Hak ol
Ko gayrı tâlib-i dîdâr-ı Hak ol
Yürü var mahzen-i esrâr-ı Hak ol
Ki her bir katrede ummân ola Hak