Rumûz-ı ‘aşkdur âsân edâ degüldür bu
Ko lâf-ı dânişi zâhid riyâ degüldür bu
Bahâr-ı hüsn geçer gülşen olmadın hurrem
‘İnânı elde mi reng-i hınâ degüldür bu
Fütâde olmayıcak kâh gibi geçmez ‘aşk
Hilâli cezb idecek kehrübâ degüldür bu
Ümîd-i vuslatun ey mâh kanda ben kanda
Husûli mümkün olur müdde‘â degüldür bu
Gehî sipihr ü gehî cevr-i yârdan Âgâh
Şikâyet itme ki semt-i rızâ degüldür bu