Murg-ı dili o şûha nisâr itmek isterüz
‘Usfûr ile hümâyı şikâr itmek isterüz
Bî-behreyüz neşât-ı cihândan o denlü kim
Hamyâze ile def‘-i humâr itmek isterüz
Rengîn terânemüzle hınâdan kalur mıyuz
Mazmûn-ı bikri beste-nigâr itmek isterüz
Bî-hûde gezmeden ne biter gird-bâdveş
Bir yerde serv gibi karâr itmek isterüz
Dildâra âh u nâlemüz Âgâh geçmedi
Müflislerüz hevâ ile kâr itmek isterüz