Dün buluşdum yâr ile hazz eyledüm ammâ ne hazz
Dil-firîb etvâr ile hazz eyledüm ammâ ne hazz
Sînesin geh çâk idüp gösterdi gâhi la‘lini
Va‘de-i bisyâr ile hazz eyledüm ammâ ne hazz
Sordum ol Yûsuf harîdârun metâ‘-ı vaslını
Pek yakîn bâzâr ile hazz eyledüm ammâ ne hazz
Bir günâh idi bana rû-yı rakîb oldum halâs
Zûr-ı istigfâr ile hazz eyledüm ammâ ne hazz
Subh-dem geldi sabâ Âgâh kûy-ı yârdan
Müjde-i dildâr ile hazz eyledüm ammâ ne hazz