Ezelden tıfl-ı gam perverde-i deyr-i mugândur dil
Nigâh-ı merhamet nâ-dîde-i çeşm-i bütândur dil
Eger sad-pâre olsa ey sitemger tîg-ı nâzundan
Yine rencîdelük bilmez derûnı mihrbândur dil
Beni terk itme zâr u nâ-tüvân oldun diyü ey gam
Ki mâh-ı nev gibi ben pîrüm ammâ ki civândur dil
Bakup her sâde-rû mir’âtına olmaz suhan-perdâz
Ki hem âyîne vü hem tûtî-i mu‘ciz-beyândur dil
Meh-i evc ü kemâl ü âftâb mülk-i ma‘nâdur
Egerçi sûretâ Âgâh bî-nâm ü nişândur dil