Rehîn-i ye’s olayum ger huzûr istersem
Gam ile haşr olayum ger sürûr istersem
Murâdı üzre sipihr eylesün beni pâ-mâl
Virüp fütâdegî elden gurûr istersem
Çü şem‘-i sûz-ı mahabbet bana harâm olsun
Miyân-ı bezm-i tarabda zuhûr istersem
Zamâne ülfet-i zühhâd ile ‘azâb itsün
Cenâb-ı pîr-i mugândan nüfûr istersem
Misâl-i ehl-i suhan gamz olmayam Âgâh
Bu siflegâhda ‘akl u şu‘ûr istersem