Güşâde olmadı ol gonçenün melâli nedür
Hazân mıyuz o gülün bizden infi‘âli nedür
Nigâhdan müte’ellim niyâzdan bî-zâr
O şûha ‘arz-ı merâm itmenün melâli nedür
Tamâm-ı ‘ömr humâr-ı firâk ile geçdi
Bilinmedi dahı keyfiyyet-i visâli nedür
Hilâline felegün itme ser-fürû ey dil
O âftâb yanında mehün kemâli nedür
Ne nagmeyüz bu tarabhânede ne tanbûruz
Zamânenün bize Âgâh gûşmâli nedür