Fürkatüñüñ hurkatından yahılur cânum meded
Hasretüñüñ mihnetinden kurur uş kanum meded
Senden ırah derd-ile dermânda oldı cân u dil
Merhamet vaktıdur iy her derde dermânum meded
Şem bigi od içinde dudaguñuñ yâdı-la
Oluram teşne-ciger iy âb-ı hayvânum meded
Çün sabâ gül yüzüñe reyhân saçuñı tagıdur
Aklumı hayrân ider iy küfr ü imânum meded
Fitne-i devr-i kamerdür gamzeñ anuñ zulmı-la
Garet itdi varlıgum iy adl-i sultânum meded
Seddi yıhdı yahdı Ye-cuc iy Sikender el-Gıyâs
Dîv tarâc itdi iklîmi Süleymânum meded
Âheni mûm itdi vü nerm idemedi gönlüñi
Ahmedî nîçe ki âh idüp didi cânum meded