Ger yâr cevr ider-ise yara sehl ola
Her-geh ki yâr elinden ola yâre sehl ola
Çün yare ki anı yâr ura yara devâ olur
Gamzeñ geçerse câna yürek yara sehl ola
Her geh ki yâre yâri ola desti gîr anı
Düşmen dilerse kim düşüre yara sehl ola
Sen rûh-ı rûhsın saña göñlini virene
Virürse cân lebüñdeki şol yara sehl ola
Zülfüñ ne gam kılursa perîşân bu göñlümi
Ger goncayı sabâ nefesi yara sehl ola
Fettân gözüñ ki uyhuda bir remz ider-ise
Kim fitnesin kıyâmetüñ uyara sehl ola
Yâr oldur Ahmedî ki alâ-külli-hâl aña
Cân u cihânı itse fidî yâra sehl ola