İlet benüm selâmumı dil-dâra iy sabâ
Arz eylegil peyâmumı ol yâra iy sabâ
Tagıt benefşe saçları gül yañag üstine
Saçdı abîr ü anberi gül-zâra iy sabâ
Penhân var yarün tapusına varur-ısañ
Gösterme kendüzüñi sen agyâre iy sabâ
Çün gizlü râzuma seni ben mahrem eyledüm
Bi’llah eyitme râzumı deyyâre iy sabâ
Bî-çâralıgumı benüm ol yâre arza kıl
Bâşed ki bula derdüme bir çâre iy sabâ
Vuslat güline irmez elüm pes nicesi ben
Bunca tahammül eyleyem ol hâre iy sabâ
Digil ki Ahmedî’ye niçe zahm urasın
Gammâz gamzelü gözi mekkâre iy sabâ