İy ki ifdâlüñ-ile vâzıh olur ilm-i nazar
Vi ki ikbâlüñ-ile râcih olur ehl-i hüner
Kamu eşrâfa sen inâmüñ-ıla virdüñ câh
Kamu etrâfa sen ikrâmuñ-ila salduñ fer
Ne var akvâlüñ arasında hatâ iy sultân
Ne var efâlüñ arasında halel iy server
Ne nevâlüñe cihânda oldı ivaz bahr u sehâb
Ne cemâlüñe zemânda oldı bedel şems ü kamer
Heybetüñden çüridi cevr ü sitem yik-pâre
Nimetüñle eridi âz u emel hem yik-ser
İrmedi rifatüñe çarh-ı felek-gâh-ı medâr
Durmadı savletüñe cirm-i Zühal vakt-i memer
Hem vücûdûn kapusın dutdı ebed ömri vatan
Hem hasûduñ yolını aldı ecel ki ide sefer
İy ki ilm-ile kamu halka sen olduñ server
Vî ki şükrüñ idenüñ oldı mezâkı şekker
Oldı uş örfüñ-ile kadr-i meâlî âlî
Buldı uş lutfuñ-ıla sadr-ı mevâlî zîver
Âsümânsın zî ki olmış saña eltâf nücûm
Bûsitânsın zî ki olmış saña atâf semer
Mîr Sülmân bu cihân milkine sensin vâlî
Şâh-ı devrân bu zamân halkına sensin yâver
Memleketde kim ola saña şebîh ü hem-tâ
Saltanatda kim ola saña nazîr ü hem-ser
İy cihân-bân senüñ-ile oldı fezâyil kâmil
İy ulu hân senüñ-ile oldı fevâzıl evfer
Bu zamânda bula mı kimse senüñ bigi melik
Bu cihânda ola mı kimse senüñ bigi beşer
Oldı İslâm kavi adlüñ-ile eyle ki güher
Oldı eyyâm azîz aduñ-ıla eyle ki zer
Râst sen adl-ilesin Kisri vü yâhûd Fârûk
Râst sen bezl-ilesin Hâtem-i Tay ya Cafer
Cümle şehler saña kul olmaga baglandı kemer
Kamu ihsân senüñ ellerüñe eyledi güzer
Oldı Hûrşîd senüñ hazretüñe bir bende
Oldı Çimşîd senüñ hidmetüñe bir çâker
Düşdi uş adlüñ-ile cevr ü sitem hasta-ciger
Oldı uş fazluñ-ıla gussa vü gam sûhte-per
Lutf-ı teşrîfüñi pîrâye-i cân iden ider
Unf-ı tahvîfüñi sermâye-i her-fitne vü şer
Menn ü isâfuñ olur vahy bigi dilde semer
Hüsn-i evsâfuñ ider suhf bigi cânda eser
Adl ü insâfuñı Hak itdi ayân şöyle ki bedr
Fazl u eltâfuñı hem itdi bedîd eyle ki havr
Revnak-ı bezmüñ ider ravza-i Firdevsi hacil
Kıssa-i rezmüñ ider Rüstem-i Destânı semer
Gayret-i bahrsın itdükde yirde feyz-i atâ
Hazret-i Bedrsin itdükde saña kimse nazar
Râyid-i fazlsın itdükde nazar vakt-i dehâ
Kâyid-i aklsın itdükde kazâ-gâh-ı fiker
Cûd-ıla lutfuñ ider bahrı senüñ gark-ı hayâ
İzz-ile kadrüñ ider çarhı senüñ püşt-i hatar
Keremüñ aldı sehân-ıla şehâ her milki
Niamüñ toldı senâñ-ıla şehâ her-kişver
Mîr Sülmânsın u olsun ten ü cân saña fidî
Şâh-ı sultân-ı cihânsın u meh-i dîn-perver
Bâyin-i nimet-i yeddür elüñ ü zeyn-i atâ
Hem murâduñ kerem ü nef-durur def-i zarar
Ben bilürem ki dil-âversin ü hânsın be-sezâ
Hükmüñe mihr ü meh olsun ebedâ fermân-ber
İy ki âfâk senüñ hamdüñ iderler yik-ser
Vî ki kuldur saña berbeste-kemer Rûm u Hazer
Cümle eşrâf-ı zamân senden alur izzet ü câh
Kamu etrâf-ı zemîn kadr ü alâ senden umar
Ahmedî kuldur saña beste-kemer
İzzet ü câh ü alâ senden umar
Bezl ü ihsânuñ-ıla buldı cihân zîb-ile fer
Adl ü insâfuñ-ıla dutdı sitem râh-ı mefer
Senüñ eltâfuñ-ıla oldı müzeyyen dîvân
Senüñ evsâfuñ-ıla oldı müzeyyen defter
Şâhâ itdükçe felek seyri nite kim ahter
Senün olsun başuña devlet-ile mihr-efser