Saçlaruñuñ çîni kim yir yüzini müşgîn ider
Cânları bende salıb u göñülleri miskîn ider
Kaşlaruña âyet-i Nûn ve’l-Kalem hayrân kalur
Yañaguñı sûre-i Şems ü Kamer tahsîn ider
Gamzeñe ider işâret cânum almaga lebüñ
Cânı şîrîndür ne kim iderse ol şîrîn ider
Dudagundan isderem kim derdüme ola devâ
Gül-şekerdür kim ciger derdini ol teskîn ider
Ol bahâr-ı âlem-i cândur yañaguñ kim anuñ
N’ireye kim aksi ire lâle vü nesrin ider
Nâle vü âhum odına göñlüñ ımşanur degül
N’ideyim kim mûmı dahı tâliüm sengîn ider
Ahmedî cân levhine yüzüñ hayâlin kıldı nakş
Ol hayâl anuñ sözini nâzük ü rengîn ider