Çeşmimün agzında ıslanmazdı gerçi mercümek
Nâfe-veş şimdi hayâl-i hâlün oldı merdümek
Çarh agladur beni gark olur âhir yaşuma
Bu meseldür dostum suda yatar sulu sinek
Gamzesiyle zülfi ucından ne gamlar çekdigüm
Sorsa yâre ‘arz iderdüm igneden iplige dek
Cennet-i kûyunla dîdârun durur maksûdumuz
Virmek Allâhun hele bizden nigârâ istemek
Kalb-i düşmen bildirür ‘ışkında hâliş oldugum
Zer ‘ayârına beli seng-i siyâh olur mihek
Hâle sanma mâhda hüsn ile ilzâm eyleyüp
Gerdeni tavkı nigârun boynına asdı elek
Kaldı zulmetde saçun hattun kenâr itdi lîk
Çekdi İskender emek Hızra nasîb oldı yemek
Kâf-ı istignâyı ‘Âşık âşiyân idüp gönül
Peşşe dimez püşte-i eflâke sîmurga sinek