Elâ ey gevher-i kân-ı risâlet
Sana bin bin salât ile tahiyyet
Hakîkat bâğının serv-i bülendi
Gül-i sad-berg-i gülzâr-ı sa’âdet
Fekâne kâbe kavseyni ev-ednâ
Uluvv-ı şânına eyler şehâdet
Nebîler gerçi halkı da’vet edip
Kamusu etdiler irşâd-ı ümmet
Velî sen geçip ef’âl ü sıfâtı
İbâdı etdin asl-ı zâta da’vet
Anınçün hâtem oldun enbiyâya
Seninle bitdi bünyân-ı nübüvvet
Habîbâ ger Halîl olduysa ceddin
Sen oldun kutb-ı eflâk-ı muhabbet
İki şakk oldu mâh engüştün ile
Çü gördü sende nûr-ı şems-i vahdet
Meded eyle Hüdâyî derd-mende
Şefâ’at yâ Resûla’llâh şefâ’at