Fazl ü ihsânını tamâm ediver
Meded eyle meded İlâhî meded
İki âlemde ber-devâm ediver
Meded eyle meded İlâhî meded
Kulluğundur Efendi izzetimiz
Hizmet etmektedir sa’âdetimiz
Sana lâyık kanı ibâdetimiz
Meded eyle meded İlâhî meded
Kereminden bizi edip îcâd
Mahz-ı fazlınla verdin isti’dâd
Eyledin çünki lutfuna mu’tâd
Meded eyle meded İlâhî meded
Nice bir derd ile hazîn olalım
Nice bir hem-dem-i enîn olalım
Fazl ü ihsânına karîn olalım
Meded eyle meded İlâhî meded
Bir avuç hâki eyledin insân
Kudretinle zuhûra geldi cihân
Zu’afâyı esirge ey Rahmân
Meded eyle meded İlâhî meded
Ey kamu hâle âlim ü dânâ
Lutfun ile olur fenâ vü bekâ
Bir efendi dahi yok ey Mevlâ
Meded eyle meded İlâhî meded
Nârı etdin Halîl’ine gülizâr
Dağ ü taş eyledi su üzre karâr
Kıl inâyet Hüdâyî’ye her bâr
Meded eyle meded İlâhî meded