Ey Aliyy ü Azîm olan Mevlâ
Ey Azîz ü Hakîm olan Mevlâ
Ey vücûdu Kadîm olan Mevlâ
Ey atâsı amîm olan Mevlâ
Ey cevâd ü Kerîm olan Mevlâ
Ey Ra’ûf ü Rahîm olan Mevlâ
Kulların kimi ehl-i tâ’atdır
Kimisi mazhar-ı inâyetdir
Kimi mest-i mey-i mahabbetdir
Sana lâyık efendi rahmetdir
Ey cevâd ü Kerîm olan Mevlâ
Ey Ra’ûf ü Rahîm olan Mevlâ
Âşık erişse ger Habîbe n’ola
Gül nasîb olsa andelîbe n’ola
Vatan anılsa bir garîbe n’ola
Hastalar varsalar tabîbe n’ola
Ey cevâd ü Kerîm olan Mevlâ
Ey Ra’ûf ü Rahîm olan Mevlâ
Nice bir ehl-i kîl ü kâl olalım
Bedre irgür yeter hilâl olalım
Vâsıl-ı şems-i bî-zevâl olalım
Sâkin-i suffe-i kemâl olalım
Ey cevâd ü Kerîm olan Mevlâ
Ey Ra’ûf ü Rahîm olan Mevlâ
Şol ki etmez seni özünde taleb
Bârid âhen döğüp çeker o ta’ab
Varlık cümleten senindir heb
Sen esirge Hüdâyî’yi yâ Rab
Ey cevâd ü Kerîm olan Mevlâ
Ey Ra’ûf ü Rahîm olan Mevlâ