Aziz Mahmud Hüdayi

Safâ-yı bâl ile Hakk’a teveccüh etse bir kişi Murâdına olur vâsıl tamâm olur anın işi

Cihân fânîdir ey gâfil yeter tapdın bu dünyâya Yürü var imdi sıdk ile ibâdet eyle Mevlâ’ya

Mâsivâdan yüz çevir başında aklın var ise Hakk’a ikbâl et eğer nûr-ı sa’âdet yâr ise

Saklayıp nâr-ı cehennemden ibâdı ol Kerîm Mahz-ı fazlıyla na’îm-i cennet ihsân eyleye

Ganîdir Hakk ile bâlim n’ola ger yoğise mâlim Umarım fazl-ı Hak ile hemîşe hoş ola hâlim

Hazret-i Hak’dan eğer ihsân ola Dîn ü dünyâ emri hep âsân ola

Kerîm Allah Rahîm Allah inâyet ede kuluna Mevâni’den halâs edip hidâyet ede yoluna

Sakın şetm etme hummâ zahmetine Ki mahmûmun sebebdir rahmetine

Cür’a-i câm-ı mahabbetden ki kim nûş eyleye Anı ol zevk ü safâ hayrân ü medhûş eyleye

Rabb-i izzetden eğer ihsân ola Dâr-ı ukbâya sefer âsân ola

Zu’afâ kullarını Hak gözede Ol sa’âdetden erişe bize de

Gönül verme cihânın lezzetine Ki ol değmez sonunda hasretine

Hazret-i Mevlâ hidâyet etmeyince bir kula Çâre yokdur ol kim insafa gele hâsıl ola

Şol âşık-ı sâdıkda kim terk-i sivâdan tâc ola Ol kasr-ı kurba erişip âlem ana muhtâc ola

Mâziye kılma te’essüf yeme müstakbel gamın Hâlini hoş gör ki ömrün hâsılı imrûzdur

Kışın iyi gününe hasmın iyi sözüne Her kim aldanırsa pişmânlığı üzerine

Beğim ol nefs-i emmâretü bi’s-sû’ Hevâsına uyanı etdi bed-hû

Bahrin ahvâlin anla cûşundan Kutlu gün bellidir doğuşundan

Fazlınladır ancak senin olduğumuz ihsân karîn El-hamdü lek ve’ş-şükrü lek âyâ mücibe’s-sâilîn

Sakın aç kalırım sanma hey insân Hemân şükr ede gör ni’met firâvân