Âlem ansuz nice ola kim âlemüñdür cânı ol
Belki cânuñ dahı olmış cânı vü cânânı ol
Akl u nefsüñ cevheri vü ins ü cinnüñ varlıgı
Arşu ferşüñ her ne kim var sâkin ü cünbânı ol
Çarh-ı gerdanüñ medâr u mihver ü kutbı vü hem
Ay u gün ü müşterî vü zühre vü keyvânı ol
Âlem-i ulvî vü siflînüñ ki görinür ayân
Zulmeti ol nûrı ol hem encüm ü erkânı ol
Hûta irince hamelden ger burûc u ger dere
Cebhe vü eklîli ol u sünbüle vü mîzânı ol
Magribüñ her şâm olduhda muanber zülfi hem
Maşrıkuñ her subhı-demde çehre-i tâbânı ol
Hem şimâlüñ ol kabûli hem debûr edbârı ol
Hem cenûbuñ cünbüşi vü hem sabâ seyrânı ol
İsa enfâsı vü Mûsânuñ münâcâtı kamu
Hem Halîlüñ odı vü Nûh-ı Necî tûfânı ol
Ders-i İdrisüñ ol u Eyyûb-ı sabrı dahı hem
Yûnusuñ tesbîhi Hızruñ çeşme-i hayvânı ol
Ahmed-i Mürsel kılıcınun yüzi vü kabzası
Anuñ atdûgı ohñuñ yayı vü hem peykânı ol
Anuñ ahbârı vü âsârı vü ecâzı kamu
Anuñ akvâli vü efâli vü hem tibyanı ol
Âkıl u makûlu aklu âşık u maşûku ışk
Yûsufuñ hüsni vü Yakûbuñ dahı ahzânı ol
Kurı yirüñ Kûh-ı Kâf u Tûr u Lübnânı vü hem
Bahruñ Okyânûs u dahı Kulzüm ü Ummânı ol
Hastalaruñ zahmı vü hem zahmlaruñ merhemi
Derd ü mend olanlaruñ derdi vü hem dermânı ol
Nahle oldur hâr u hurmâ nahle oldur nûş u nîş
Remlüñ âramı vü nemlüñ her yaña seyrânı ol
Berrüñ oldur bürri vü dürlü nebât u cevheri
Bahruñ oldur bî-gümân dürri vü hem mercânı ol
Hem hazânüñ nimeti vü desti-gâhu işreti
Hem bahâruñ zîneti vü rahmet-i nem-sânı ol
Gûyibâruñ servi vü âb-ı revân u sebzesi
Mürgü-zâruñ nergisi vü lâle-i numânı ol
Gül-sitânuñ rengi vü berk ü nevâ vü nüzheti
Bû-sitânuñ yâsemînü anberü reyhânı ol
Goncanuñ ceybinde müşgi vü yüzi gül-gûnesi
Hem gülüñ her-geh ki ola handân leb ü dendânı ol
Sûsenüñ oldur dili vü hem çenâruñ elleri
Hilati agaçlaruñ u kuşlaruñ elhânı ol
Lâlenüñ yüregi dâgı vü benefşe gussası
Hem gülüñ yüzi hayâsı bülbülüñ efgânı ol
Dil-berüñ anber saçınuñ fitne vü teşvîşi hem
Anuñ ol ranâ gözinüñ gamze-i fettânı ol
Fâsıkuñ şuglı olu câm-ı mey ü mey-hânesi
Zâhidüñ tekbîr ü tehlîli vü hem sübhânı ol
Fıkh ehline kitâb u sünnet icmâ u kıyâs
Ol u ehl-i hikmetüñ hem-hüccet ü bürhânı ol
Mü’min ü kâfir dime her kanda bahsañ anı gör
Kâfirüñ küfri olu hem mü’minüñ îmânı ol
Andan ayru nesne olmah mümtenidür pes yakîn
Vâcibüñ oldur vücûbı mümkinüñ imkânı ol
Ne vücûdı ola gayruñ çünki oldı kamunuñ
Evveli vü âhiri peyœâsı vü pinhânı ol
Ahmedînuñ fehmü vehmü zikrü fikrü aklı hem
İlmü fazlu nazmu nesrü defter ü dîvânı ol
Bu fakîruñ tefrika hâlinde gör cemin ü bil
Kim nice diler geçe bu bahr-ı bî-pâyânı ol
Dahı birdendür bu nâle ney bigi sen sanma kim
Kendünden düzüp-durur bu nagme vü destânı ol