Yüzüñüñ gurresin ol ki itdi garrâ
Saçuñuñ turresin kıldı mutarrâ
Cemâlüñ kamu âfetden münezzeh
Kemâlüñ cümle noksândan müberrâ
Ne suda gördi ne yirde misâlüñ
Cihânı seyr iden bahren ve berrâ
Seni sevdügüme iderler melâmet
Teberrâ sini sevmezden teberrâ
Sözüñ dilümdedür leylen nehâren
Aduñ zikrümdedür cehren ve sırrâ
Senüñ vasfuñ diyeli Ahmedînüñ
Sözi her aybdan oldı muarra
Niçe kim çarh döne hîç âşık
Bu resme idemeye ebyât-ı garrâ