Dudaguñuñ lali cân derdine dermân yaraşur
Pes aña her kim dir-ise âb-ı hayvân yaraşur
Saçuña disem şeb-i târîk söz bârîk olur
Yañaguña dir-isem hûrşîd-i tâbân yaraşur
Gâh güldürür beni ışkuñ u geh zâr agladur
Âşık olan şem-veş handân u giryân yaraşur
Gözlerüme ol kad ü bâlâ hayali hoş düşer
Anda ki ahar cûy ola serv-i hıramân yaraşur
Kej-durur zülfüñ aña ger küfr diyem ola râst
Yüzüñe ger dirler-ise nûr-ı îmân yaraşur
Gûherinde agzuñuñ gören dişüñ nazmını dir
Zî ki dürc-i lal içinde dürr-i Ummân yaraşur
Gözlerüñ-ile saçuñ yañahlaruñda hoş düşer
Nergis ü reyhân-ıla tâze gül-istan yaraşur
Rûşen ol kim hüsn mülkinde senüñ şâh olduguñ
Şöyle kim bu memleketde Mîr Sülmân yaraşur
Padişâh-ı şark u garb u ins ü cinn ü vahş ü tayr
Ol-durur bî-şek aña dimek Süleymân yaraşur
Andan artuh beglerüñ işi ser-â-ser şeytanat
Anuñ işi saltanatdır adı sultân yaraşur
Çarh peymân itdi kim vire aña milk-i ebed
Çün salâh-ı milkdür aña bu peymân yaraşur
Âsitân olmaga tûbî kapuñ ider arzû
Pâsübân olmaga eyvânuña keyvân yaraşur
Gayr-i Kur’ân her ne kim geldi-se ahkâm u suhuf
Yüce aduñ kamunuñ üstinde ünvân yaraşur
Zîr ü bâlâ her ne kim var tâ meh ü mihr ü sipihr
Buyruguñ altında cümle bende-fermân yaraşur
Düşmenün kim gâv-peykerlıg-ıla har-magzdur
Ger felek sevri olursa saña kurbân yaraşur
Kankı agızda ki ola pâk ü pâkîze güher
Kutlu aduñ şöyle kim dillerde Kur’ân yaraşur
Alnuña ay u yüzüñe gün disem söz hûb olur
Göñlüñe bahr u elüñe dir-isem kân yaraşur
Çünki idem vasfuñı takrîr defter bizenür
Çünki medhüñi kılam tahrîr dîvân yaraşur
Yir yüzine rahmet-içün Hak halîfe itdi seni
Pes saña bu kim didiler zıll-ı Rahmân yaraşur
Ayaguña sîm ü zer lâyık degül ki ola nisâr
Yoluña hâk olmaga lal-ile mercân yaraşur
Ahmedî kimdür ki ola lâyık senüñ kullıguña
Saña çâker olmaga fagfûr u hâkân yaraşur
Saña lâyık ben kimem ki ide bilem medh ü senâ
Saña gökdeki feriştehler senâ-h wân yaraşur
Gerçi kim küstâhlıkdur rûşen olsun şâha kim
Ben kula medh ü şehâ tahsîn ü ihsân yaraşur
Saña Allah hâfız olsun u feriştehler muîn
Kim melâ’ik saña avân Hak nigeh-bân yaraşur